काठमाडाैं १८ भदौ ।भारतको  हरियाणास्थित मेदान्त अस्पतालमा कार्यरत ३९ वर्षीय नेपाली चिकित्सक सुजितकुमार साहको मंगलबार एउटा अपार्टमेन्टको आठौं तलाबाट खसेर मृत्यु भएको छ । विराटनगर निवासी डा.साह ४ वर्षदेखि मेदान्तमा लिभर ट्रान्सप्लान्ट युनिटमा कन्सल्ट्यान्टका रूपमा कार्यरत थिए ।

डा.साह मंगलबार बिहान सेक्टर ४७ स्थित उनी बस्दै आएको अपार्टमेन्टको आठौं तलाको कौसीबाट खसेका थिए । गम्भीर घाइते उनलाई तत्कालै मेदान्त अस्पताल पुर्‍याइएको थियो । तर चिकित्सकले उनलाई मृत घोषित गरेका थिए । पारिवारिक स्रोतका अनुसार प्र्रहरीले प्रारम्भिक छानबिनमा उनले आत्महत्या गरेको देखिएको जनाएको छ । यद्यपि शवको पोस्टमार्टम हुन बाँकी छ ।

डा.साह अपार्टमेन्टमा एक्लै बस्दै आएका थिए । उनको पश्चिम बंगालकी एक चिकित्सकसँग विवाह भएको थियो । उनीहरूबाट एक ६ वर्षीया छोरी छिन् । डा.साह सोमबार साँझसम्म मेदान्त अस्पतालमा ड्युटीमा थिए । सहकर्मीहरूका अनुसार त्यस दिन पनि उनी अन्य दिनजस्तै सामान्य अवस्थामा थिए । तर मंगलबार एकाएक साहले आफू बस्ने अपार्टमेन्टबाट हाम फालेको खबरले सबैलाई स्तब्ध बनाएको छ ।
 

मेदान्तमा डा.साहसँगै कार्यरत नेपाली चिकित्सक डा. सञ्जयकुमार यादवले घटनाबाट आफू स्तब्ध भएको बताए । ‘सुजित दाइसँग सोमबार दिनभर नै सँगै थियौं । अरू दिन जस्तै रमाइलोसँग समय बितेको थियो, खै के भयो अचानक विश्वास नै गर्न कठिन भइरहेको छ,’ डा.यादवले भने । पारिवारिक स्रोतका अनुसार पछिल्लो समय दुईबीच राम्रो सम्बन्ध नभएको र साहलाई श्रीमतीले छोडपत्रका लागि दबाब दिँदै आएकी थिइन् । त्यही दबाबले उनलाई आत्महत्या गर्ने परिस्थितिमा पुर्‍याएको आशंका साह परिवारले गरेको छ । मृतक साहको परिवारले उनलाई आत्महत्या गर्न बाध्य पारिएको भन्दै छानबिनको माग गरेको छ ।

‘अघिल्लो दिनसम्म ड्युटीमा खटिएको र सबै हिसाबले सामान्य अवस्थामा रहेको व्यक्तिले कसरी आफैं आत्महत्या गर्न सक्छ, त्यसैले ऊमाथि अन्तिम समयमा ठूलो दबाब परेको निश्चित छ,’ साहका बुबा नरेन्द्रप्रसाद साहले भने । नरेन्द्रका अनुसार सुजितमाथि श्रीमतीले सम्बन्धविच्छेदका लागि दबाब दिइरहेकी थिइन् । तर सुजितले भने सानी छोरी पनि भएकी हुँदा छोडपत्र गर्न अस्वीकार गरिरहेका थिए । तर अन्तिम समयमा दबाब थेग्न नसकेर सुजित आत्महत्या गर्न बाध्य भएको परिवारको भनाइ छ । आत्महत्या गर्न बाध्य पारिएको भन्दै परिवारका तर्फबाट आत्महत्या दुरुत्साहनको मुद्दा दायर गर्ने तयारी गरिरहेको साहले कान्तिपुरलाई बताए ।

साह परिवारका कान्छा छोरा सुजितले पोखराको मणिपाल कलेजबाट एमबीबीएस गरेका थिए । पछि भारतको चण्डीगढस्थित पीजीआईबाट मास्टर इन सर्जरी र पछि दिल्लीको एम्सबाट सर्जरीमा सुपर स्पेसलाइजेसन गरे । साहले छोटो समयमै लिभर ट्रान्सप्लान्ट (कलेजो प्रत्यारोपण) का लागि कुशल चिकित्सकको परिचय बनाएका थिए । उनलाई रोबोटिक लिभर ट्रान्सप्लान्टको विशेषज्ञका रूपमा चिनिन्थ्यो । सहकर्मीबीच डा.साहको परिचय निकै मिलनसार र सरल व्यक्तिका रूपमा रहेको थियो । ‘४ वर्ष सँगै काम गरियो, कहिल्यै पनि उहाँको अनुहार अँध्यारो देखिएन, सबैलाई माया गर्ने अति नै सरल हुनुहुन्थ्यो,’ डा.यादवले बताए ।