धनगढी, २६ साउन । कैलाली कञ्चनपुरमा अधिकांश भुभाग डुवानमा परेका छन् । आइतबार देखी लगातारको बर्षाका कारणले तराईका धेरैजसो ठाउँ डुवानमा परेका हुन । सुदूरपश्चिम प्रदेशको अस्थायी राजधानी धनगढी जलमग्न भएको छ । धनगढी बजारमा निकासको उचित व्यवस्था नहुदा लगातार डुवान हुने गरेको छ ।
धनगढीको मुख्य बजार क्षेत्र एलएन चोक, शिवनगर, चौराह, मिलन चोक, बिशालनगर, राष्ट्र बैंक पछाडि, उत्तरबेहडी लगायतका अधिकांस क्षेत्र जलमग्न भएका हुन । जसका कारण धनगढीका ३ सय घरमा पनि पसेको छ भने १५ घर परिवारलाई सुरक्षित स्थानमा स्थानान्तरण गरेको कैलाली प्रहरीले जनाएको छ ।
त्यस्तै कैलालीको पुर्वी क्षेत्र भजनी, जोशीपुर, टिकापुर, लालबोझी लगायतका क्षेत्र भएर बग्ने नदिहरु कर्णाली, कान्द्रा, पथरैया, मोहना, खुटिया, शिवगंगा लगायतका नदिहरुमा जलस्तर निरन्तर बढीरहेको छ ।
जिल्ला प्रशासन कार्यालय कैलालीले सबैलाई सुरक्षीत रहन आग्रह गरेको छ । गत साउन १४ गते आएको बाढीका कारण भजनी नगरपालिकाका तीन जनाले ज्यान गुमाएका थिए ।
उता पहाडी जिल्ला बाजुरामा एक वडाध्यक्षकी आमा वेपत्ता भएकी छन् । अविरल वर्षापछि आएको बाढीले बडिमालिका नगरपालिका वडा नम्बर २ का वडा अध्यक्ष डम्मर महतकी आमालाई बगाएर बेपत्ता बनाएको हो ।
सोमबार बिहान नदीले घर बगाउँदा ६५ बर्षिया आमा अइसेनी बेपत्ता भएकी प्रहरीले जनाएको छ । यस्तै बाढीले बाजुरामा थुप्रै पुलहरु बगाएको छ । बुढीगंगा नदीमा आएको बाढीले बाजुराका विभिन्न बस्ती जोखिममा परेका छन् ।