तेज बोहरा
बढ्दो रगतको मागलाई परिपुर्तीका लागि जयपृथ्वीबहादुर सिहंको १४२ औं जन्मजयन्तीको अवसरमा भोली धनगढीमा खुल्ला रक्तदान कार्यक्रम हुने भएको छ । सुर्मादेवि बझाङ्गी समाज धनगढीको आयोजनामा रक्तसञ्चार केन्द्रमा खुल्ला रक्तदान कार्यक्रम हुन लागेको हो ।
जयपृथ्वीबहादुर सिहंको १४२ औं जन्मजयन्तीको अवसरपारि भोली भदौ ७ गते शनिबार रक्तदान कार्यक्रम हुन लागेको आयोजक सुर्मादेवि बझाङ्गी समाज धनगढीका महासचिव दिर्घ जाशीले जानकारी दिए । उनका अनुसार रक्तदान कार्यक्रम विहान ८ बजेदेखी सुरु भई अपरान्ह ३ बजेसम्म चल्नेछ । 
प्रदेशको एकमात्र रिफेरल सेती प्रादेशिक अस्पताल धनगढीमा दिनप्रति दिन रगतको माग बढ्दै गएकोले रक्तदान कार्यक्रम आयोजना गरिएको महासचिव जोशीले बताए । 
बझाङका राजा विक्रमबहादुर सिंह र माता रुद्रकुमारीदेवीको कोखबाट मानवतावादी राजा जयपृथ्वीबहादुर सिंहको १९३४ साल भदौ ७ गते जन्म भएको थियो ।
“मेरो जात मानव हो, मेरो धर्म मानवतावाद हो, मेरो सिद्धान्त मानवतावाद हो । मेरो न कुनै अन्य जात छ न कुनै धर्म छ । तपाईँहरू पनि मानवतावादी आन्दोलनमा आउनुहोस् र आफ्नो चिन्तनशक्तिको सदुपयोग गर्नुहोस्” यो सन्देश लिएर विश्व भ्रमण गर्ने एसियाकै पहिला व्यक्ति हुन् मानवतावादी राजा जयपृथ्वी बहादुर सिंह ।
मानिसले मानिसलाई राम्रो व्यवहार गर्ने, मानवीय व्यवहार गर्ने तथा मानिसको आदर्श, प्रतिष्ठा र प्रकृतिमा विश्वास गर्ने दर्शनलाई मानवतावादी दर्शन भनिन्छ । मानव जीवनमा आघात र्पुयाउनु, असुविधा र्पुयाउनु वा जीवनलाई दुस्खमय बनाइदिनु नै मानवकष्ट हो । मानवतावाद भनेको यी सबै कष्टको निराकरण गरी सुखसुविधा साथ जीवन संरक्षण गर्ने उपाय हो । आफ्नो धर्म, राष्ट्र, सिद्धान्त, जातभन्दा माथि रहेर गर्ने व्यवहार नै मानवतावाद हो । शान्ति, एकता र सहयोगात्मक भावना मानवतावादी दर्शनका मूल मन्त्र हुन् ।
एउटा सानो बाइसे राज्य बझाङमा जन्मिएका जयपृथ्वी बहादुर सिंह मानवतावादी दर्शनका प्रणेता हुन् । उनले सन् १९२८ मा बैङ्ग्लोरमा मानवतावादी क्लब स्थापना गरेर विश्वभर नै मानवतावादी अभियान सञ्चालन गरेका थिए । 
जयपृथ्वीले संसारका सबै मानिस एउटै परिवारका सदस्यका रूपमा र सबै देशले सहअस्तित्वको माध्यमद्वारा विश्वब्रम्हाण्डको छहारीमुनि रहन सकेमा मात्र स्थायी विश्वशान्ति सम्भव छ भन्ने बुझाउन एवं युद्धरत मुलुकका पीडित पक्षलाई उद्धार र पीडक पक्षलाई मानवता सम्झाउन विश्वशान्ति सञ्जाल खडा गरी विश्वव्यापीरूपमा शान्ति र मानवतावादी सङ्गठन खोलेका थिए ।
जयपृथ्वीले रोक्न खोजेको मुलुक मुलुकबीचको युद्ध एवं मुलुकहरूभित्रका भिडन्तमात्र नभई मानवले मानवलाई गर्ने शोषण र उत्पीडन जस्ता दुष्प्रवृत्ति पनि हुन् ।
नेपाली परिवेशमा जयपृथ्वी महामानव थिए । राष्ट्रवादी जयपृथ्वी ६४ वर्षमा हिंडिरहेका बेला १९९७ साल असोज १ गते भारतको व्याङलोरमा स्वर्गीय भएका थिए ।