धनगढी ।भारतको पलियामा नेपाली पत्रकारहरूलाई स्वागत तथा सम्मान गरिएको छ । लखिमपुर जिल्लाका पत्रकार तथा ब्यापारी एवं समाजसेवीले नेपाल पत्रकार महासघं कैलालीको नव निर्वाचित कार्यसमितिलाई सम्मान तथा स्वागत गरेको हो । भारत पलियाका वरिष्ठ पत्रकार जय कुमार गुप्ता, समाजसेवी तथा भारतीय जनता पार्टीका नेता रबी गुप्ता लगायतले पत्रकार महासघंको नव निर्वाचित टिमले सम्मान तथा स्वागत गरेको हो ।पलियामा एक कार्यक्रमको आयोजना गरी माला, दोसल्ला तथा मायाको चिनो सहित नेपाली पत्रकारहरुलाई स्वागत तथा सम्मान गरेको हो । सम्मान कार्यक्रममा बोल्दै पलियाका वरिष्ठ पत्रकार जय कुमार गुप्ताले त्रेता युग देखीको नेपाल भारत सम्बन्ध रहेकाले पत्रकारिता क्षेत्रबाट यसलाई थप प्रगाढ बनाउनुपर्नेमा जोड दिए । नेपाल भारत रोटी बेटीको सम्बन्ध भएका कारण सञ्चार माध्यमले यो सम्बन्ध मजबुत बनाउन भूमिका खेल्नुपर्ने उनको भनाई छ । उनले भारतीय पर्यटकहरूलाई नेपाल आवागमनमा सहज बनाउन पहल गर्नुपर्ने बताए । भन्सारमा सहज वातावरण बनाए नेपालमा भारतीय पर्यटकहरू धेरे बढ्ने उनले बताए ।भारतीय जनता पार्टीका नेता एवं पलियाका समाजसेवी रबी गुप्ताले भारत र नेपालका सञ्चारकर्मीको सम्बन्ध बढाउन यो कार्यक्रम आयोजना गरिएको बताए । थुप्रै परिवर्तन देखी विकासका क्षेत्रमा सञ्चार माध्यमको महत्त्वपूर्ण भूमिका रहेका कारण नेपाल तथा भारतका नाकामा पनि सहज बनाउन सञ्चार माध्यमले भूमिका खेल्नुपर्ने उनको भनाई छ । नाकामा प्रहरीबाट समस्या आउँछ, गाडी भन्सार वारी राख्नुपर्छ उनले भने “नाकामा सहज बनाइदिए भारतका पर्यटक गोदावरी, चिसापानी, महेन्द्रनगर तथा सुदूरपश्चिमका पहाडी जिल्लामा समेत जाने थिए, तर भन्सार र प्रशासनिक समस्याले पर्यटक बढेका छैनन्, पहिलाको तुलनामा धेरै सहज भए पनि पूर्ण रूपमा सहज भएको छैन, यो सहजताका लागी पनि सञ्चार माध्यमले भूमिका खेल्नुपर्छ ।”गुप्ताले नेपाल र भारतीय सीमामा आउने समस्यालाई सञ्चार माध्यमले सहजै समस्या समाधान गर्ने खालको भूमिका खेल्नुपर्नेमा जोड दिए । कार्यक्रममा बोल्दै नेपाल पत्रकार महासघं कैलालीका अध्यक्ष श्रवण देउवाले यस कार्यक्रमबाट नेपाल र भारतका पत्रकारहरूबिच परिचय गर्ने अवसर मिलेको बताए । दुवै देशका सञ्चारकर्मीले आ आफ्नो भूमिका निर्वाह गर्नुका साथै सीमा क्षेत्रमा आउने समस्या हल गर्न समेत भूमिका खेल्नुपर्ने उनको भनाई थियो । यस्ता कार्यक्रमलाई निरन्तरता दिनुपर्ने बताउँदै देउवाले सुदूरपश्चिममा घुम्ने थुप्रै ठाउँ भएका कारण परिवार सहित सुदूरपश्चिम आउन भारतीय पर्यटकहरूलाई आग्रह गरे ।कार्यक्रममा पत्रकार महासघं कैलालीको कार्यसमिति, महासघं सुदूरपश्चिम प्रदेश समिति सदस्य कृतबहादुर बिष्ट, प्रेस युनियन कैलाली अध्यक्ष सिताराम ओझा, रमा चन्द लगायत पत्रकार सहभागी थिए । भारतका तर्फबाट पत्रकार तथा विभिन्न समाजसेवी सहभागी थिए । कार्यक्रम अयाेजनाकाे लागि भारतिय पत्रकार शिशिर शुक्लाले  सहजिकरण गरेका थिए।