धनगढी । कैलालीको धनगढी उपमहानगरपालिकामा तीन वटा फरक पर्व बिशेष सांस्कृतिक कार्यक्रम एउटै मञ्चमा गरिएको छ । उपमहानगरपालिकाको वडा नम्वर १९ आई गाउँमा तीज, गौरा तथा अटवारी बिशेष सांस्कृतिक कार्यक्रम गरि तीन वटै पर्व एकै मञ्चमा मनाइएको हो । आज मंगलबार वडा नम्बर १९ को आर्थिक सहयोगमा पार्वती ओलीको अध्यक्ष्यतामा रहेको सांस्कृतिक कार्यक्रम संचालन समितिले तीन वटै पर्व विशेष कार्यक्रम एउटै मञ्चमा सम्पन्न गरेको छ । कार्यक्रममा सुदुरपश्चिम प्रदेशका पहाडी जिल्लाका बासिन्दाले मनाउने गौरो बिशेष डेउडा,थारु समुदायले मनाउने अटवारी बिशेष थारु नृत्य र सबै समुदायले मनाउने तीज बिशेष नृत्य प्रस्तुत गरिएको थियो । सामाजिक सद्भभाव र एकता बढाउन तथा एक समुदायले अर्को समुदायको अस्तित्व स्विकार गर्ने प्रबृतिको विकास गर्न धनगढी १९ मा तिन वटा फरक पर्वलाई एउटै मञ्चमा मनाइएको बताइएको छ । उक्त सांस्कृतिक कार्यक्रममा एकल तीज नृत्यतर्फ महेश्वरी कुञ्जेडा प्रथम हुदाँ सञ्जना रानाभाट द्धितीय र अर्चना बयाडी तृतीय भइन् । आज कार्यक्रम सम्पन्न हुदाँ राति परेकाले पुरस्कार भोली असोज ३ गते वितरण गरिने बताइएको छ । मौलिक तीज गीत नृत्यमा सुर्यमुखि आमा समूह धनगढी १९, जे गाउँ प्रथम हुदाँ सगरमाथा आमा समुह धनगढी १४ डि गाउँ द्धितीय र लाली गुराँस आमा समुह ए गाउँ तृतीय स्थान प्राप्त गर्न सफल भए । सामुहिक थारु नृत्यमा देउनी जेठानी समुह प्रथम हुदाँ आदिवासी जनजाति सखिया नाच समुह द्धितीय र झुम्रा नाच समुह कैलारी तृतीय स्थान प्राप्त गर्न सफल भए । एकल थारु नृत्य तर्फ रचना चौधरी प्रथम हुदाँ एन्जीला चौधरी द्धितीय र पार्वती कोली तृतीय भइन् । देउडा गीत नृत्यमा सुदुरपश्चिम लोक सांस्कृतिक समाज फूलवारीका तिन वटै टिम प्रथम,द्धितीय र तृतीय स्थान हासिल गर्न सफल भए ।गौरा प्रस्तुतिमा मालिकार्जुन समूह प्रथम र सुदुर पश्चिम लोक सांस्कृतिक समाज फूलवारीको समुह द्धितीय स्थान ओगट्न सफल भएको आयोजकले जानकारी दिएको छ । सांस्कृतिक कार्यक्रममा प्रिन्स खड्का बाल प्रतिभा पुरस्कारबाट सम्मानित भएकी छन् ।धनगढी १९ आई गाउँ घर भएकी प्रिन्साले उत्कृष्ट नृत्य प्रस्तुत गरेको भन्दै बाल प्रतिभा घोषित गर्दै सम्मानित गरिएको आयोजकको भनाई छ । पार्वती ओलीको अध्यक्षतामा सम्पन्न सांस्कृतिक कार्यक्रममा चर्चित मोडल अनु खड्का, खडक तिरुवा लगायत तीन जना निर्णायक रहेका थिए । भने प्रमुख अतिथि सुदुरपश्चिम प्रदेश सरकारका भौतिक पुर्वाधार मन्त्री प्रकाश बहादुर देउबा रहेका थिए ।