धनगढी । कैलालीको धनगढी उपमहानगरपालिका १८ स्थित फूलवारी बहुमुखी क्याम्पसले विद्यार्थी भर्ना अभियान प्रवर्धन गर्न तीज बिशेष सांस्कृतिक कार्यक्रम सम्पन्न गरेको छ । आज शनिबार क्याम्पसको प्रांगणमा तीज, देउडा गीत तथा नृत्य,धार्मिक मन्त्र बाचन गरि सांस्कृतिक कार्यक्रम सम्पन्न गरिएको हो । धनगढी उपमहानगरपालिकाको फूलवारी र कैलारी गाउँपालिका क्षेत्रको एकमात्र बहुमुखी क्याम्पसले स्नातक तह प्रथम बर्षमा विद्यार्थी भर्ना अभियानलाई प्रबर्धन गर्ने उद्देश्यले तीज कार्यक्रम गरिएको बताइएको छ । तीज विशेष सांस्कृतिक कार्यक्रम अवलोकन गर्न तथा प्रतिस्पर्धामा सहभागि हुन विभिन्न ठाउँबाट मानिसहरु आउने हुदाँ क्याम्पसको भर्ना अभियानको बारेमा जानकारी दिन सजिलो र प्रभावकारी हुने विश्वासका साथ तीज कार्यक्रम गरिएको क्याम्पस प्रमूख बम बहादुर बमले बताए । वि.स २०६६ सालमा स्थापना भएको बहुमुखी क्याम्पसमा हाल शिक्षाशास्त्र संकाय र व्यवस्थापन संकायमा अध्यापन भइरहेको छ । क्याम्पसले  आयोजना गरेको तीज बिशेष सांस्कृतिक कार्यक्रममा २१ जना प्रतिस्पर्धी रहेका थिए । सरस्वती खड्का र निर्मला साउँदले प्रथम स्थान प्राप्त गर्न सफल भएका थिए । अंकिता बुढाथोकीले द्धितीय स्थान प्राप्त गर्दा पूर्णिमा खड्का तेस्रो भइन् । प्रतियोगितामा स्मृति भट्टराई सान्त्वना स्थान हासिल गर्न सफल भइन् । प्रतियोगितामा प्रथमलाई ७ हजार ५ सय,द्धितियलाई ४ हजार ५ सय, तृतीयालाई ३ हजार र सान्त्वना १५ सय नगद पुरस्कार सहित प्रमाण पत्र प्रदान गरिएको थियो ।सुदुरपश्चिम प्रदेश सभाका पूर्व सांसद नेपालु चौधरीको प्रमुख आतिथी रहेकाे कार्यक्रम क्याम्पस ब्यवस्थापन समिति अध्यक्ष रमेश बस्नेतकाे अध्यक्षतामा सम्पन्न भएको थियोे ।