समाचार
कमिलाको डरले क्वाटरमा बस्दैनन् सुदूरपश्चिम प्रदेशका वनमन्त्री !
धनगढी ।राता कमिलाको डरले सुदूरपश्चिम प्रदेशका उद्योग, पर्यटन वन तथा वातावरण मन्त्री लक्ष्मण किशोर चौधरी मन्त्रालयको क्वाटरमा बस्न छाडेका छन् । उनी दुई महिनादेखि मन्त्रालयसँगै जोडिएको मन्त्रीको क्वाटरमा बस्न छाडेका हुन् । मन्त्रालयको क्वाटर जीर्ण, अस्तव्यस्त तथा सरसफाईमा कमी हुँदा राता कमिलाको ताँतीले गर्दा बस्न अफ्ठ्यारो भएका कारण मन्त्री चौधरी क्वाटरमा नबसी लामो यात्रा गरी दैनिक मन्त्रालय आउने गरेका छन् । मन्त्री चौधरी दैनिक एक सय किलोमिटरको दूरी तय गर्दै धनगढी आउजाउ गर्छन् । यसबारेमा टेलिफोन सम्पर्क गर्दा मन्त्री चौधरीले भने,‘क्वाटर व्यवस्थित नहुँदा राता कमिलाले बस्न गाह्रो भएको छ । क्वाटर मर्मत सम्भारका लागि भनेको छु ।’ आफू दशैंपछि क्वाटरमा नबसेको उनले बताए । उनले भने,‘कमिलाकै डरले म त्यहाँ बस्न सकिन, त्यसैले टीकापुर घरबाटै मन्त्रालय आउजाउ गर्छु ।’
यता उनका प्रमुख स्वकीय सचिव नवीन थापा मन्त्रीको स्वास्थ्यलाई ध्यानमा राख्दै घरबाटै आउजाउ गरिरहेको बताए । ‘केही दिन पहिला मन्त्री चौधरीले राता कमिलाले सताउने गरेको बताए पनि उहाँको स्वास्थ्यलाई मध्यनजर गर्दै घरबाटै आउजाउ गर्नुहुन्छ,’ उनले भने,‘उहाँको घर कर्णाली नदी नजिकै भएकाले कर्णाली नदीको माछा पनि खान पाइने र त्यसले स्वास्थ्यलाई पनि फाइदा हुने भएकाले टीकापुरबाटै मन्त्रालय आउजाउ गर्नुहुन्छ ।’
मन्त्री चौधरीको मृगौलामा समस्या छ । मन्त्री चौधरी नियमित डायलाइसिस गर्नुहुन्छ । माछा खाँदा स्वास्थ्य राम्रो हुने भएकाले पनि मन्त्री चौधरी टीकापुर नै आउजाउ गरिरहनु भएको कुरा उनका प्रमुख स्वकीय सचिव थापाले बताए । यस सम्बन्धमा समाचार संकलनका लागि मन्त्रालय पुग्दा क्वाटरमा रहेको मन्त्रीको कोठामा ताल्चा लगाइएको थियो ।
तपाइको प्रतिक्रिया दिनुहोस्